बार्सिलोना सेल्टा डी भिगोसँग बराबरीमा रोकियो

काठमाडौं, २१ कात्तिक । स्पेनिस ला लिगा फुटबलमा बार्सिलोना सेल्टा डी भिगोसँग बराबरीमा रोकिएको छ । आइतबार राति भएको रोमान्चक खेलमा बार्सिलोना सेल्टा डी भिगोसँग ३–३ गोल अन्तरको बराबरीमा रोकिएको हो ।

सुरुवाती तीन गोलको अग्रतालाई बचाउन नसक्दा बार्सिलोनाले बराबरीमा रोकिन बाध्य भयो । खेलको ५औँ मिनेटमा अंशु फातीले गोल गर्दै बार्सिलानालाई सुरुवाती अग्रता दिलाएका थिए ।

यस्तै, १८ओं मिनेटमा सर्जियो बुस्केट्सले गोल गर्दै अग्रता दोब्बर बनाए । ३४औँ मिनेटमा मेम्फिस डेपेले गोल गर्दा पहिलो हाफ ३–० को गोल अन्तरमा सकिएको थियो । तर, दोस्रो हाफमा सेल्टा डी भिगोले आफ्नो लय समात्दै शानदार प्रदर्शन गर्‍यो ।

खेलको ५२औँ मिनेटमा लागो अस्पासले गोल गर्दै खेललाई ३–१ को स्थितिमा ल्याएका थिए । ७४औँ मिनेटमा नोलिटोले गोल गर्दै टोलीलाई केही आसा दिलाएका थिए । यस्तै, खेलको इन्जुरी समयको अन्तिम मिनेटमा गोल गर्दै अस्पासले टोलीलाई हारबाट जोगाए । १७ अङ्क जोडेको बार्सिलोना ९औँ स्थानमा रहेको छ भने सेल्टा डी भिगो १२ अंकका साथ १५औँ स्थानमा रहेको छ ।

प्रतिक्रिया दिनुहोस्
धेरै पढिएको