ईसीसी विश्व क्रिकेट लिग–२ अन्तगर्त नेपालको अमेरिकामाथि पाँच विकेटको जित

काठमाडौँ, २९ भदौ। ईसीसी विश्व क्रिकेट लिग–२ अन्तगर्त नेपालले अमेरिकालाई पाँच विकेटले हराएको छ । आईसीसी विश्व क्रिकेट लिग–२ अन्तर्गत आज सम्पन्न पहिलो एकदिबसीय खेलमा नेपालले अमेरिकालाई पाँच विकेटले हराएको हो । नेपालको अन्तर्राष्ट्रिय एकदिबसीय खेलमा अमेरिकामाथि यो लगातार तेस्रो जित हो । यसअघि नेपालले घरेलु मैदानमा खेलिएको पछिल्लो दुई खेलमा समेत अमेरिकालाई हराएको थियो ।

अमेरिकाले प्रस्तुत गरेको २३१ रनको लक्ष्य नेपालले खेल सकिन एक ओभर बाँकी छदा मात्र पाँच विकेटको क्षतिमा पुरा गर्‍यो । नेपालको जितमा रोहित पौडेलले अविजित ६२ रनको पारी खेल्नुभयो । जितका लागि मात्र तीन रन आवश्यक छदा बिनोद भण्डारीले ‘रिभर्स स्वीप’ खेल्ने क्रममा ३७ रनको व्यक्तिगत योगफलमा अमेरिकी विकेटकीपरको हातमा क्याच थमाउनुभयो । १४५ रनमा चार विकेट गुमाउँदा दबाबमा आएको नेपाली पारीलाई रोहित पौडेल र बिनोद भण्डारीको जोडीले जित नजिक डोरयायो । दुबैजनाले पाँचौँ विकेटका लागि ८३ रनको साझेदारी गर्नुभयो ।

बिनोदले ४८ बलमा दुई चौका र एक छक्काको सहयोगमा ३७ रनको योगदान दिँदा रोहितले अविजित ६२ रनको योगदान दिनुभयो । उहाँले ८७ बलको सामना गर्दै दुई चौका र तीन छक्का लगाउनुभयो । रोहितले ४७ औँ ओभरको दोस्रो बलमा छक्का लगाउँदै आफ्नो अर्धशतक पुरा गर्नुभयो । रोहितले अन्तर्राष्ट्रिय एकदिबसीयमा लगातार आफ्नो दोस्रो अर्धशतक पुरा गर्नुभयो । यसअघि उहाँले पपुवान्यूगिनी विरुद्धको दोस्रो एकदिबसीय खेलमा समेत अर्धशतक पुरा गर्दै ८६ रनको पारी खेल्नुभएको थियो ।

ओपनर कुशल भुर्तेल र आशिफ शेषले ६६ रनको साझेदारी गर्दा नेपालले औसत लक्ष्य पछ्याउने क्रममा उत्कृष्ट सुरुवात गर्न पुग्यो । आशिफ शेषले २३ रन बनाएर पेभेलियन फर्किनुभयो । अर्का ओपनर कुशल भुर्तेलले भने ९३ बलको सामना गर्दै तीन चौका र तीन छक्काको सहयोगमा ८४ रनको उत्कृष्ट पारी खेल्नुभयो । उहाँले अन्तर्राष्ट्रिय एकदिबसीय खेलमा आफ्नो पहिलो अर्धशतक लगाउनुभयो ।

कप्तान ज्ञानेन्द्र मल्ल १७ र कुशल मल्ल एक रन बनाएर पेभेलियन फर्किदा नेपाली पारी दबाब आएको थियो । कप्तान मल्ल पेभेलियन फर्केपछि चौथो नम्बरमा रोहित पौडेल ब्याटिङ गर्न आउनुभयो । तर कुशल भुर्तेलले रोहित र रोहितले बिनोद भण्डारीसँग उत्कृष्ट साझेदारी गर्दा नेपालको जित सुनिश्चित भयो ।

कुशल भुर्तेलले रोहित पौडेलसँग तेस्रो विकेटका लागि ५१ रनको साझेदारी गर्नुभयो । भुर्तेल पेभेलियन फर्किदा ब्याटिङ गर्न आउनुभएका कुशल मल्ल एक रन जोड्दै आउट भएपछि बिनोद भण्डारी ब्याटिङ गर्न आउनुभयो । त्यसअघि, ओमानको अल एमिरात क्रिकेट रङशालामा टस जितेर पहिला ब्याटिङ गर्ने निर्णय गरेको अमेरिकाले पुरै ५० ओभर खेल्दै नौ विकेटको क्षतिमा २३० रनको योगफल तयार गरेको थियो । अमेरिकाका लागि मनाङ्क पटेलले शतकीय पारी खेलेपछि अमेरिकाले सम्मानजनक योगफल तयार गर्न सफल भयो । उहाँले मात्र ११४ बलको सामना गर्दै नौ चौका र एक छक्काको सहयोगमा एक सय रनको योगदान दिनुभयो ।

नेपालको प्रमुख बलर सोमपाल कामी विकेटविहीन रहनुभयो । उहाँले नौ ओभरमा ४४ रन खर्चिनुभयो । बिक्रम सोबले छ ओभरमा ३३ रन खर्चेर दुई तथा सन्दीप लामिछानेले दश ओभरमा ३५ रन खर्चेर दुई र सुशन भारीले दश ओभरमा ३१ रन खर्चेर दुई विकेट लिनुभयो । कुशल मल्लले एक विकेट लिनुभयो । नेपालले दोस्रो खेलमा ओमानको सामना गर्नेछ । गोरखापत्र

प्रतिक्रिया दिनुहोस्
धेरै पढिएको