न्यायिक समितिमा एकसय एक मुद्दा फर्छ्योट

तनहुँ, १३ असोज । जिल्लाको भीमाद नगरपालिकाको न्यायिक समितिमा पाँच आर्थिक वर्षमा एक सय ६६ मुद्दा दर्ता भएका छन् । दर्ता भएका मुद्दामध्ये एक सय एक फर्छ्योट भएका छन् । बाँकी १० मुद्दा फर्छ्योटको प्रक्रियामा रहेको सो नगरपालिका कार्यालयले जनाएको छ ।

सो अवधिमा नगरपालिकाको न्यायिक समितिमा दर्ता भएका मुद्दामध्ये अधिकांश मिलापत्रबाट हुने गरेको भीमाद नगरपालिकाका अधिकृत अजय सुवेदीले जानकारी दिनुभयो । न्यायिक समितिमा परेका मुद्दा नगरपालिकाबाटै छिनोफानो गरिँदा अदालत जानुपर्ने झन्झटको अन्त्य हुनुका साथै आर्थिक भारमा कमी आएको प्रमुख प्रशासकीय अधिकृत टेकनाथ दाहालले जानकारी दिनुभयो ।

मुद्दा दर्ता भएकामध्ये अधिकांश साँध सिमाना मिचिएको विवाद, मानाचामल, आर्थिक लेनदेन, पतिपत्नीबिचको झगडालगायतका छन् । न्यायिक समितिमा दर्ता भएका अधिकांश मुद्दा मिलापत्रबाट मिलाउने गरिएको नगरपालिकाकी उपाध्यक्ष एवं न्यायिक समितिकी संयोजक शारदा खनालले जानकारी दिनुभयो । दुवै पक्षको जीत हुनेगरी न्यायिक समितिले मुद्दा किनारा लगाउँदा दुवै पक्ष खुसी भएर घर फर्किने गरेको उहाँले बताउनुभयो ।

प्रतिक्रिया दिनुहोस्
धेरै पढिएको