लागूपदार्थ नियन्त्रणका लागि युवा जेन्जीको महत्त्वपूर्ण पहलमा प्रजिअलाई ज्ञापनपत्र
रौतहट, ३० कात्तिक । लागूऔषध (नशा) दुरुपयोगको बढ्दो समस्यालाई सम्बोधन गर्न र यसको नियन्त्रण तथा न्यूनीकरणमा सरकारको ध्यानाकर्षण गराउन रौतहटका उत्साही जेनेरेसन जे-जेन्जी युवाहरूले एक महत्त्वपूर्ण कदम चालेका छन्। उनीहरूले आइतबार जिल्ला प्रशासन कार्यालय गौरमा प्रमुख जिल्ला अधिकारी लाई एक विस्तृत ज्ञापनपत्र बुझाएका छन्।
जेन-जेड नेपाल नामक युवा समूहका प्रतिनिधिहरूको टोलीले जिल्ला प्रशासन प्रमुखलाई भेटेर बुझाएको उक्त ज्ञापनपत्रमा गाउँदेखि शहरसम्म तीव्र रूपमा फैलिँदै गएको लागू औषध दुरुपयोगको विकराल अवस्थाप्रति गहिरो चिन्ता व्यक्त गरिएको हो । युवाहरूले यो समस्याले रौतहटको भविष्यलाई नै जोखिममा पारेको उल्लेख गर्दै यसलाई तत्काल नियन्त्रण गर्न प्रभावकारी कदम चाल्नका लागि जिल्ला प्रशासनसँग जोडदार माग गरेका छन्।
युवाहरूको सामूहिक आवाज बोकेको ज्ञापनपत्रमा लागूऔषध नियन्त्रणका लागि निम्न चार मुख्य क्षेत्रहरूमा तत्काल पहल गर्न सुझाव दिइएको छ:
सचेतना कार्यक्रम सञ्चालन: विद्यालय, कलेज र समुदायस्तरमा लागूऔषधको दुर्गुण र यसले पार्ने असरबारे सचेतना कार्यक्रमहरू नियमित रूपमा सञ्चालन गर्ने।
सुरक्षा निकायसँग समन्वय: स्थानीय प्रशासन र सुरक्षा निकाय प्रहरी बीच लागूऔषध नियन्त्रणका गतिविधिमा समन्वय बढाउने र संयुक्त अभियान चलाउने।
निगरानी सुदृढीकरण: लागूऔषधको कारोबारमा संलग्न व्यक्ति र सञ्जालहरूमाथि प्रशासन र सुरक्षा निकायले सुदृढ निगरानी बढाउने र कारबाही गर्ने।
पुनर्स्थापना र परामर्श केन्द्र: दुर्व्यसनमा फसेका युवाहरूको पुनर्स्थापना (रिह्याबिलिटेसन) र उनीहरूलाई आवश्यक मनो–सामाजिक सल्लाह (परामर्श) केन्द्र स्थापना गरी उपचारको व्यवस्था मिलाउने।
प्रजिअबाट प्रशंसा र आश्वासन
ज्ञापनपत्र बुझाउने टोलीमा शैलेन्द्र यादव, अरुण पटेल, सुधांशु यादव र मुनावर आलम लगायतका युवा अगुवाहरूको उपस्थिति थियो।
ज्ञापनपत्र बुझ्दै जिल्ला प्रशासन प्रमुखले रौतहटका युवाहरूको यो समयसापेक्ष र महत्वपूर्ण पहलको खुलेर प्रशंसा गरे। युवाहरूले उठाएका जायज मागहरूलाई गम्भीरतापूर्वक लिएको बताउँदै मागहरू कार्यान्वयनका लागि जिल्ला प्रशासनले सम्भाव्य पहल गर्ने र यसका लागि सम्बन्धित निकायहरूसँग समन्वय गर्ने आश्वासन दिए।
युवा जेन्जीहरूको यो पहलले लागूऔषध नियन्त्रणको विषयलाई पुनः एक पटक बहसको केन्द्रमा ल्याएको छ। यसले समाजका हरेक वर्गलाई लागूऔषधविरुद्धको लडाइँमा एकजुट हुन प्रेरणा दिएको छ।
