पत्रकार र युवा सङ्घबीच भएको फुटबल प्रतियोगिता बराबरीमा
पाटन (ललितपुर), २९ माघ । केपी ओली कप अन्तर्राष्ट्रिय फूटबल प्रतियोगिताको प्रचारप्रसारका लागि खेलकुद पत्रकार र युवा सङ्घ नेपालबीच भएको खेल बराबरीमा टुङ्गिएको छ । यही फागुन ११ गतेदेखि १९ गतेसम्म हुने तेस्रो संस्करणअन्तर्गतको प्रतियोगिताको प्रचारप्रसारका लागि आज एन्फा खेलमैदान सातदोबाटोमा भएको खेल ४ –४ गोलको बराबरीमा टुङ्गिएको हो ।
आज नेकपा (एमाले) का नेता भानुभक्त ढकालले रेफ्रीलाई फुटबल हस्तान्तरण गर्दै खेल शुभारम्भ गर्नुभएको थियो ।
प्रतियोगितामा ‘ए’ डिभिजन क्लब र केही विदेशीसहित १० टोलीको सहभागिता रहने युवा सङ्घले जनाएको छ । विजेताले रु १५ लाख ११ हजार १११, उपविजेताले रु पाँच लाख प्राप्त गर्ने युवा सङ्घका अध्यक्ष क्षितिज थेबेले जानकारी दिनुभयो । प्रतियोगिताको क्वाटरफाइनलसम्मका खेल सातदोबाटोस्थित एन्फा कम्प्लेक्समा तथा सेमिफाइनल र फाइनल खेल त्रिपुरेश्वरस्थित दशरथ रङ्गशालामा हुने उहाँले जानकारी गराउनभयो ।
प्रतियोगिताका सर्वोत्कृष्ट खेलाडीलाई रु एक लाख, उत्कृष्ट गोलरक्षक, उत्कृष्ट गोलकर्ता, उत्कृष्ट उदियमान खेलाडीलाई रु ५०–५० हजार दिइने युवा सङ्घले जनाएको छ ।
