युगान्डामा पूर्व एलआरए कमान्डरलाई ४० वर्षको कारावास सजाय

कम्पाला, ९ कात्तिक । युगान्डाको एक अदालतले शुक्रबार लर्ड्स रेजिस्टेन्स आर्मी (एलआरए) का पूर्व कमान्डर थोमस क्वोयेलोलाई एउटा ऐतिहासिक युद्ध अपराध मुद्दामा समूहको दुई दशक लामो आतङ्कमा उहाँको भूमिकाका लागि ४० वर्षको कारावास सजाय सुनाएको छ ।

युगान्डाको अदालतमा युद्ध अपराधका लागि खतरनाक सङ्गठनका कुनै सदस्यलाई मुद्दा चलाइएको यो पहिलो पटक हो । उक्त सङ्गठनले राष्ट्रपति योवेरी मुसेभेनी विरुद्ध दुई दशक लामो विद्रोह गरेको थियो ।

अगस्टमा ४४ वटा युद्ध अपराध र मानवता विरुद्धको अपराधमा दोषी ठहर गरिएका क्वोयेलो विरुद्धको सजाय उत्तरी शहर गुलुमा उच्च अदालतको अन्तर्राष्ट्रिय अपराध विभाग (आइसिडी) मा मुद्दाका प्रमुख न्यायाधीश माइकल एलुबुले घोषणा गर्नुभएको थियो ।

न्यायाधीश एलुबुले क्वोयेलोलाई १४ दिनभित्र सजाय र÷वा दोषी ठहर विरुद्ध अपिल गर्ने अधिकार रहेको बताउनुभयो ।

उहाँ विरुद्धका आरोपहरूमा हत्या, बलात्कार, यातना, लुटपाट, अपहरण र आन्तरिक रूपमा विस्थापित व्यक्तिहरूका बस्तीहरूको विनाश समावेश थिए ।

क्वोयेलोले यसअघि आफू विरुद्धका सबै आरोपहरूलाई अस्वीकार गर्नुभएको थियो । उहाँलाई १२ वर्षको उमेरमा एलआरएले अपहरण गरेको थियो र उहाँ निम्नस्तरको कमान्डर बन्नुभएको थियो ।

एलआरए पूर्व अल्टार बोय र स्व–घोषित भविष्यवक्ता जोसेफ कोनीले सन् १९८० को दशकमा दश आज्ञाका आधारमा शासन स्थापना गर्ने उद्देश्यले युगान्डामा स्थापना गर्नुभएको थियो ।

सङ्गठनको विद्रोहमा युगान्डादेखि सुडान, प्रजातान्त्रिक गणतन्त्र कङ्गो र मध्य अफ्रिकी गणतन्त्रसम्म फैलिएको आतङ्कको शासनमा एक लाखभन्दा बढी मानिस मारिए र ६० हजार बालबालिका अपहरणमा परेका थिए ।