आइतबार ०६ साउन, २०८१

नेपाली समय

बाँझो जग्गामा ड्रागन फ्रुट, आम्दानी पनि राम्रो

बाँझो जग्गामा ड्रागन फ्रुट, आम्दानी पनि राम्रो

गलकोट (बागलुङ) २१ असार । कालीगण्डकी नदी किनार खनियाबासस्थित पाँच रोपनी बाँझो जग्गाले मुहार फेरेको छ । दुई वर्षको अन्तरालमा खनियाबासको उक्त बाँझो जग्गामा अहिले राताम्मे ‘ड्रागन फ्रुट’ फलेका छन् ।

बागलुङ नगरपालिका–१ रामरेखाका बिमलेश आचार्यले बाँझो जग्गा सदुपयोगका लागि लगाउनु ड्रागन फ्रुटबाट मनग्य आम्दानी गर्न थाल्नुभएको छ ।  दोस्रो चरणको उत्पादन दिइराखेको ड्रागन फ्रुटको माग धान्नै नसक्ने अवस्थामा रहेको आचार्यको भनाइ छ । उहाँले रामरेखास्थित तीन रोपनी जग्गामा समेत ड्रागन फ्रुटको खेती गर्नुभएको छ । दुई ठाउँ गरेर आठ रोपनी जग्गामा गरिएको खेतीबाट दोस्रो चरणको उत्पादन राम्रो भइरहेको उहाँले बताउनुभयो । 

आचार्यले जिल्लामै पहिलोपटक व्यावसायिक रुपमा बहुगुणी ड्रागन फ्रुटको खेती थाल्नुभएको हो । “ड्रागन फ्रुटको विषयमा चासो राख्दै जाँदा लोकेन्द्र विष्टको अन्तर्वार्ता हेरेको थिएँ, त्यहाँबाट प्रभावित भएर आठ रोपनीमा ड्रागन फ्रुटको खेती सुरु गरेको हुँ”, उहाँले भन्नुभयो, “सुरुमा ठूलो लगानी भए पनि फसल भने लामो समयसम्म लिन सकिने रहेछ ।” ड्रागन फ्रुट खेतीमा हालसम्म रु ५० लाख लगानी भइसकेको उहाँले सुनाउनुभयो । 

ड्रागन फ्रुटको विरुवा रोपेको दुई वर्षमै दोस्रो चरणको ड्रागन फ्रुट उत्पादन भइरहेको बताउदै पहिलो चरणमा एक सय ५० केजी ड्रागन फ्रुट उत्पादन भएकोमा दोस्रो चरणमा चार सय केजी उत्पादन भएको आचार्यको भनाइ छ । उहाँले एक याममै रु दुई लाखसम्मको बिक्री भएको बताउनुभयो ।

रातो रङ्गको ड्रागन फ्रुटको व्यावसायिकखेती जिल्लामै उदाहरणीय बनेको छ । दुई हजार एक सय ड्रागन फ्रुटका बिरुवा लगाएकामा सबै बिरुवा राम्रोसँग हुर्किएर फल लाग्न थालेपछि आफू हर्षित भएको उहाँले सुनाउनुभयो । 

अहिले प्रतिकेजी रु पाँच सयका दरले ड्रागन फ्रुट घरबाटै बिक्री भइरहेको छ । उहाँले भन्नुभयो, “ड्रागन फ्रुटको खेतीका लागि मल्चिङ प्रविधि र थोपा सिँचाइको व्यवस्था छ ।” उहाँले प्रतिबिरुवा रु चार सयमा खरिद गरेर लगाइएको जानकारी दिनुभयो । उहाँले छ सय सिमेन्टका पोल र टायर खरिद, जग्गा व्यवस्थापन, तारबार,  बिरुवा लागि रु ५० लाखभन्दा बढी लगानी गरेको बताउनुभयो । यो फल गर्मी र सुक्खा हावापानीमा हुने सिउँडी प्रजातिको फल हो । यस फलको जातमा रातो बोक्रा, पहेँलो बोक्रा र सेतो रङ हुने गरेको छ । यस फलमा १२ प्रकारका मिनिरल्स तथा भिटामिन पाइन्छ ।