आइतबार ०६ साउन, २०८१

नेपाली समय

दुर्गाबाबु पाठक स्मृति सङ्गीत पुरस्कार रायनलाई

दुर्गाबाबु पाठक स्मृति सङ्गीत पुरस्कार रायनलाई

काठमाडौँ, १७ असार । सशस्त्र प्रहरी निरीक्षक स्व दुर्गाबाबु पाठकको स्मृतिमा स्थापित ‘दुर्गाबाबु पाठक स्मृति सङ्गीत पुरस्कार’ कीर्तिपुरस्थित नेपाल एपिएफ स्कुलको कक्षा ८ मा अध्ययरत छात्र रायन घिमिरेलाई प्रदान गरिएको छ ।

सशस्त्र प्रहरी परिवार महिला सङ्घको २३औँ वार्षिकोत्सवको अवसर पारेर आज आयोजित कार्यक्रममा सङ्घकी उपाध्यक्ष सावित्रा कुमारी जैसीले घिमिरेलाई पुरस्कार प्रदान गर्नुभयो ।

यसअघिका वर्षमा सो पुरस्कार नेपाल एपिएफ स्कुल कीर्तिपुरका छात्र आशिष रोकाया, साइजित पाण्डे, अनिष थापामगर र अर्जुन झालाई प्रदान गरिएको थियो । 

स्व पाठको स्मृतिमा सिसं ७ सशस्त्र प्रहरी निरीक्षक आधारभूत तालिमका सहकर्मीद्वारा सामूहिकरुपमा २०७३ सालमा अक्षयकोष स्थापना गरिएको थियो । कोषमा जम्मा भएको रकमको ब्याजबाट हरेक वर्ष सशस्त्र प्रहरी परिवार महिला सङ्घको वार्षिकोत्सवमा सो पुरस्कार नेपाल एपिएफ स्कुलमा अध्ययनरत सङ्गीततर्फ प्रथम हुने छात्र तथा छात्रालाई प्रदान गरिँदै आइएको छ  ।

स्व पाठकले  ‘पक्षी र निन्द्रा लाग्दैन’ गरी दुई वटा एल्बम बजारमा ल्याउनुभएको थियो ।  गीतसङ्गीतमा रुचि राख्ने पाठक २०६०/६१ सालमा चितवनमा सम्पन्न सिनर्जी राइजिङ स्टारको उत्कृष्ट १० भित्र पर्न सफल तथा आठौँ कालिका म्युजिक अवार्डमा वेष्ट आर्टिष्टको उपाधिसमेत हात पारेका  थिए ।

गीत लेख्ने, सङ्गीत दिने र आफैँ गाउने क्षमता भएका स्व पाठकको प्रतिभालाई अमर राख्नका लागि उक्त अक्षयकोष स्थापना गरिएको हो । कर्तव्यपालनाको सिलसिलमा २०७२ चैत २८ गते धादिङको मलेखुमा भएको सडक दुर्घटनामा परी उहाँको निधन भएको थियो ।