२०७७ फागुन १६, आइतबार

img-responsive

०२:४७:५९

 

पार्टी विभाजन र एकता इतिहासको पुनरावृत्ति: मन्त्री अर्याल

गोठालो खबर
गोठालो खबर -१ २०७७ फागुन १०, साेमबार,०२:५८:PM  
img-responsive

स्याङ्जा, ९ फागुन । कृषि तथा पशुपंक्षी विकास मन्त्री पद्माकुमारी अर्यालले नेकपा विघटन कुनै नौलो कुरा नभई इतिहासको पुनरावृत्ति भएको बताउनुभएको छ । आइतबार गण्डकी र लुम्बिनी प्रदेश जोड्ने सडक कालोपत्रेको शुभारम्भ गर्दै मन्त्री अर्यालले पार्टी फुट्ने र जुट्ने कार्य कुनै नौलो नभई इतिहासको संस्करण भएको बताउनुभएको हो ।

‘पहिलो कुरा नेकपा फुटेको छैन । पार्टी विभाजन र एकता कुनै नौलो होइन । इतिहासको पुनरावृत्ति हो’, मन्त्री अर्यालले भन्नुभयो, ‘यसलाई व्यवस्थित ढङ्गले लैजान सम्माननीय प्रधानमन्त्री एवं पार्टी अध्यक्ष लाग्नुभएको छ ।’ अहिलेको नेकपा घटनालाई व्यवस्थापन गर्न पार्टी अध्यक्ष केपी शर्मा ओली प्रतिबद्ध भएर लागिरहेको मन्त्री अर्यालको भनाई थियो ।

निर्वाचनमा मुलुक अगाडि बढिसकेको भन्दै उहाँले पार्टी औपचारिक रूपमा नफुटेको र एउटै रहेको बताउनुभयो । उहाँले भन्नुभयो, ‘प्रधानमन्त्रीले आग्रह गरिरहनुभएको छ । मुलुक निर्वाचनमा अगाडि बढिसक्यो, आउनुस् मिलौँ निर्वाचनमा जाऔँ, अब सडकमा होइन निर्वाचनमा तयारीमा लागौँ ।’ 

देशमा अशान्ति फैलाउन खोज्ने पार्टीलाई समेत संविधानको मूलधारमा ल्याउन सरकार लागिपरेको भन्दै उहाँले सिके राउतलाई ल्याइसकेको र अर्को पार्टीलाई समेत ल्याउने प्रयास भइरहेको बताउनुभयो ।  यसैबिच स्याङ्जाको सिद्धार्थ राजमार्गसँग जोडिएका आधा दर्जन सडक पिच भएको मन्त्री अर्यालले दाबी गर्नुभएको छ । आइतबार वालिङ, भुम्रे, डुम्रेभञ्याङ, बानीडाँडा हुवास हुँदै लुम्बिनी प्रदेशको गुल्मी जोड्ने सडक कालोपत्रे शिलान्यास गर्दै मन्त्री अर्यालले यस्तो दाबी गर्नुभएको हो । 

राजमार्गसँग जोडिएका आधा दर्जन भित्री सडकहरू यो ३ वर्षमा पिच भएको उहाँले दाबी गर्नुभएको हो । ‘हामी तथ्य, प्रमाणमा टेकेर बोल्छौँ । स्याङ्जाका आधा दर्जन भित्री सडक पिच गरिएको छ’, उहाँले भन्नुभयो, ‘केही हुँदैन । विकास भएको छ । जनताले विकासको अनुभूत गरेका छन् ।’

गल्याङ, चापाकोट, सडक, अर्जुनचौपारी घण्टे सडक, प्याराग्लाईडिङ स्थल स्वरेक मैदान जाने बयरघारी बगरे बजार र अर्को वालिङ डौँवालगायतका सडक पिस भएको उहाँको भनाई छ । आइतबार नै मन्त्री अर्यालले पेलाकोट पिडिखोला सडकको समेत कालोपत्रे शिलान्यास गर्नुभएको छ । 

प्रतिक्रिया दिनुहोस्
© 2020 All rights Reserved to gothalokhabar.com
Powered By: NectarDigit.Com