प्रहरी भवन निर्माण गर्न शाक्यद्वारा २९ लाखको जग्गा निःशुल्क प्रदान

भोजपुर, १७ साउन। यहाँको पौवादुङमा गाउँपालिकामा प्रहरी चौकी निर्माणका लागि स्थानीय खड्गराज शाक्यले निःशुल्क जग्गा प्रदान गर्नु भएको छ । जग्गा अभावमा प्रहरीको भवन निर्माणमा समस्या भएपछि  शाक्यले रु. २९ लाख बराबरको तीन रोपनी जग्गा निःशुल्क दिनु भएको हो।

जग्गा पाएसँगै अब चौकी निर्माणमा सहजता भएको जिल्ला प्रहरी कार्यालय भोजपुरका प्रमुख राजकुमार राईले बताउनुभयो । प्रमुख राईले भन्नुभयो ‘‘जग्गा नहुँदा प्रहरी चौकी निर्माणमा समस्या भएको थियो । चौकीको नाममा जग्गा प्राप्त भएको छ । अब प्रहरी भवन निर्माणको लागि पहल थाल्छौँ ।’’

गाउँपालिकाको पहलमा चौकीको नाममा जग्गा प्राप्त गर्न सफल भएको गाउँपालिका अध्यक्ष किरण राईले बताउनुभयो । गाउँपालिकाको सुरक्षाका लागि अस्थायी प्रहरी चौकी स्थापना गरेको भएपनि आफ्नो नाममा जग्गा नहुँदा प्रहरीलाई भवन निर्माणमा समस्या रहेको उहाँको भनाइ छ । अब जग्गा प्राप्त भएकाले प्रहरीको भवन निर्माणमा गाउँपालिकाले पहल गर्ने राईले बताउनुभयो ।

अध्यक्ष राईले भन्नुभयो, ‘‘गाउँपालिकामा अस्थायी प्रहरी चौकी स्थापना गरेर सुरक्षा प्रदान भइरहेको छ । प्रहरीको भवन नहुँदा गाउँपालिकाको भवनमा बस्नुपर्ने अवस्था छ । जग्गा प्रहरीको नाममा पास भयो । अव भवन निर्माणमा हामी पनि पहल गर्नेछौँ । लाखौँको सम्पत्ति गाउँपालिकाको हितको लागि निःशुल्क दिने  जग्गादातालाई धन्यवाद दिन चाहन्छु ।’’

अध्यक्ष राईले  स्थानीयबासीहरुले यसअघि पनि मिराराई बहुउद्देश्यीय अन्तर्राष्ट्रिय रङ्गशाला, स्वास्थ्य चौकी लगायत संरचना निर्माणको लागि निःशुल्क जग्गा दिएकोसमेत बताउनुभयो ।

गाउँपालिकाको सुरक्षामा सहजता होस् भन्ने उद्देश्यले प्रहरीलाई जग्गा दिएको जग्गादाता खड्गराज शाक्यले बताउनुभयो । यसले गाउँपालिकाको विकासमा टेवा पुग्ने उहाँको भनाइ छ । जग्गादाता शाक्यले भन्नुभयो,‘‘हाम्रो सुरक्षामा खट्ने प्रहरीको आफ्नै भवन नहुँदा समस्या छ । प्रहरीको समस्या बुझेर मैले निःशुल्क जग्गा दिएको छु । अब प्रहरीको प्रहरीको आफ्नै भवन बनेको हेर्ने इच्छा छ ।’’

Nalgad Municipality


प्रतिक्रिया दिनुहोस्
धेरै पढिएको